ትካል ስደተኛታት ሕቡራት ሃገራት ብዛዕባ ጸጥታዊን ሰብኣውን ውሕስነትን ኣብ ክልል ትግራይ ኣብ ዝርከቡ መዓስከራት ዘለዉ ኤርትራውያን ስደተኛታት ኣዝዩ ከምዝተሻቐለ ገሊጹ።

ሰብመዚ መንግስቲ ፈደራል፡ ናብቶም ኣብ ትግራይ ኣብ ሕማቕ ኩነታት ወዲቖም ዘለዉ ስደተኛታት ዘድልዮም ሰባዊ ረዲኤት ከብጽሑ ብህጹጽ ከፍቅድ’ውን ጸዊዑ’ሎ።

እቲ ትካል ሎሚ ኣብ ዘውጽኦ መግለጺ፡ ብዛዕባ ዘይተረጋገጸ ዝበሎ፡ ኣብ ልዕሊ’ቶም ስደተኛታት ዝበጽሕ ዘሎ “መጥቃዕቲ፡ ጭውያን ግዱድ ዕስክርናን ኣዝዩ ኣሰንቢዱና ኣሎ” ኢሉ።

ኢትዮጵያ ንዝሓለፉ ክልተ ዓሰርተታት ዓመታት ንኤርትራውያን ስደተኛታት ዑቕባ ክትህብ ምጽንሓ ብምንኣድ፡ ኣብዚ እዋን’ዚ ግን ኣብ ማእከል እቲ ግጭት ኣትዮም ምህላዎም ጠቒሱ።

“መንግስቲ ኢትዮጵያ ንኤርትራውያን ስደተኛታት ናይ ምዕቋብን ውሕስነቶም ምርግጋጽን ሓላፍነቱ ክፍጽም ኤን-ኤች-ሲ ኣር ይጽውዕ” ኢሉ።

ኣፈኛ ‘ዩ-ኤን-ኤች-ሲ-ኣር ንቢቢሲ ትግርኛ ኣብ ዝሃበቶ ቃል፡ “ብዛዕባ ውሕስነትን ጸጥታን ኣብ ትግራይ ዘለዉ ስደተኛታት ዘለና ስግኣት እናዓበየ መጺኡ’ሎ” ኢላ።

“ዘሻቕል ጸብጻባት በጺሑና ኣሎ” ዝበለት ኣፈኛ ጁሌት ስቲቨንሰን “መሰል ዑቕባ ክኽበር ንጽውዕ” ክትብል ተማሕጺና።

ተሓለቕቲ መሰላት ስደተኛታት ኤርትራ፡ ገለ ካብኦም ብሓይሊ ናብ ኤርትራ ከምዝተወስዱ ይገልጹ ኣለዉ።

ብሰንኪ ምቁራጽ ኣገልግሎታት ተሌፎንን ኢንተርነትን ነቲ ኩነታት ብናጻ ኣካል ምርግጋጽ ኣይተኻእለን።

• ኤርትራውያን ስደተኛታት ኣብ ትግራይ ክሰርሑ እንታይ ከማልኡ ይሕተቱ?
• ቅልውላው ኢትዮጵያ፡ ንኤርትራውያን ስደተኛታት ብኸመይ ክጸልዎም እዩ?
• ኣብ ትግራይ ንዝርከቡ ኤርትራውያን ስደተኛታት ኣገልግሎት ንምቕራብ ከምዝተጸገመ ሕቡራት ሃገራት ገሊጹ

ክሳብ ሕጂ ሰራሕተኛታት ሰባዊ ረዲኤት ናብቲ ትግራይ ኮነ ናብቲ ናብ መዓስከራት ስደተኛታት ክኣትዉ ከምዘይክኣሉ’ውን ሓቢራ።

“ኣብዚ እዋን’ዚ ኣብቲ መዓስከራት ዝነበረ ናይ መግቢ ቀረብ ተወዲኡ’ሎ። ክሳብ ሕጂ ኸኣ ናብቶም መዓስከራት ክንኣቱ ኣይከኣልናን” ትብል ስቲቨንሰን ካብ ለንደን።

ብመሰረት ጸብጻብ ትካል ስደተኛታት ሕቡራት ሃገራት ልዕሊ 96,000 ኤርትራውያን ስደተኛታት ኣብ 4 መዓስከራት ተዓቛቦም ምጽንሐም ይፍለጥ።

ንሳቶም ብሰንኪ፡ ግዱድን ገደብ-ኣልቦን ሃገራዊ ኣገልግሎትን፡ ካልኦት ምግሃስ ሰባዊ መሰላትን ካብ ሃገሮም ዝወጽኡ ምዃኖም ተጣበቕቲ መሰላት ይገልጹ።

እዞም ብሰንኪ እቲ ኣብ ክልል ትግራይ ተወሊዑ ዘሎ ግጭት ኣብ ሓደጋ ዝወደቑ ኤርትራውያን ስደተኛታት ካብቲ ዝጸንሕሉ መዓስከራት ይበታተኑ ምህላዎም ይግለጽ ኣሎ።

ዓለምለኻዊ ማሕበር ቀይሕ መስቀል ኣብ ዝሓለፈ ሰሙን፡ ኣብ ዘውጽኦ መግለጺ ብኣሽሓት ዝቑጸሩ ኤርትራውያን፡ ካብቲ ኣብ ጥቓ ከተማ ሽረ ዝነበሩ መዓስከራት ናብ ከተማ መቐለ ይኣትዉ ከምዘለዉ ጠቒሱ።

“ገለ 1000 ዝኾኑ ኤርትራውያን ስደተኛታት ካብቶም ኣብ ከባቢ ሽረ ዝርከቡ መዓስከራት ናብ መቐለ ኣትዮም ኣለዉ ይበሃል ኣሎ።

“ብዙሓት ድማ መግብን ካልእ ደገፍን ደልዯም ናብ ቤት ጽሕፈት ዓለምለኻዊ ማሕበር ቀይሕ መስቀል፡ ጨንፈር መቐለ ይመጹ ኣለዉ። ኩሎም ተጸበይቲ ሰባዊ ሓገዝ’ዮም። ናብ መቐለ ዝኣቱ መስመራት ቀረብ ተሰናኺሉ ስለዘሎ፡ ነቶም ጠለባት ምምላእ ኣጸጋሚ ኮይኑ’ሎ” ይብል እቲ መግለጺ።

ሓላፊ ትካል ስደተኛታት ሕቡራት ሃገራት ፊሊፖ ገራንዲ ንኣገልግሎት ዜና ኣሶስየትድ ፕረስ ኣብ ዝሃቦ ቃል፡ ብዛዕባ ውሕስነትን ኩነታትን እቶም ኤርትራውያን ከምዘተሓሳሰቦ ገሊጹ ነይሩ።

more read

ኣብ ልዕሊኦም ዝበጽሕ ዝኾነ በደል ድማ ዓለምለኻዊ ሕጊ ዝጥሕስ ምዃኑ ፍሊፖ ግራንዲ ኣጠንቂቑ።

ተዛማዲ ትሕዝቶ

• ካብ ጥሪ ክሳብ መጋቢት፡ ልዕሊ 9 ሽሕ ኤርትራውያን ኣብ ኢትዮጵያ ዑቕባ ሓቲቶም27 ጉንቦት 2020
• ኤርትራውያን ስደተኛታት ኣብ ትግራይ ክንቀሳቐሱን ክሰርሑን እንታይ ከማልኡ ይሕተቱ?23 ሕዳር 2019
• ኣብ ትግራይ ንዝርከቡ ኤርትራውያን ስደተኛታት ኣገልግሎት ንምቕራብ ከምዝተጸገመ ሕቡራት ሃገራት ገሊጹ17 ሕዳር 2020
• ኣብ ትግራይ ዝርከቡ ኤርትራውያን ስደተኛታት ናብ ውሑስ ቦታ ክግዕዙ ጻውዒት ቀሪቡ11 ሕዳር 2020

ዜናታት

• ኮንግረስ ኣመሪካ ብዛዕባ ‘ኲናት ትግራይ’ ዝምልከቱ መርተዖታት ክሰምዕ’ዩ